هجرانین اودو
هجرانین اودونا یاندیقجا اورک
وصالین عشقیله جانلانیر دیلک
نه قدر قارانلیق منی سیخسادا
اگیلمز کوره گیم ، یورولماز بیلک
آل گونش عشقیله دوشموشم یولا
سئوگیلیم سحرله وئریب قول – قولا
دویورام صاباحین شیرین نغمه سین
بیرلیک ده تبریز ده ییغیشاق طویا
اوره گیمده مین بیر آرزو اولسادا
بو یولدا جان آغیر درده باتسادا
مینیندن بیرینه چاتاجاغام من
بو تایی او تایا قاتاجاغام من
سن منیم سسیم سن ، من سنین سسین
یورولماسین قارداش دئیه ن نفسین
گل قاتاق سسیمیز سسلره دؤنسون
یاراق آیریلیغین چیرکین سینه سین
ازلدن بیر اوخا یارالاندیق بیز
بیر ائودن نه یامان آرالاندیق بیز
حسرتین اودونا یاندیق دیز به دیز
او گوندن یاسلیدیر آنامیز تبریز
او گونو گؤرسئیدیم گلمیشم سیزه
اوتورموشام قارداشیملا اوز اوزه
داهی اوره گیمین بیتر یاراسی
باکی دان یوللانیب چاتاق تبریزه
«ارک»ین سلامی وار «قیز قالاسی»نا
«قورو گؤل» «گؤی گؤل»-و سالیر یادینا
جیرتدان قارانلیقدا پیچیلداشیری
ساوآلان حسرتدی اؤز بالاسینا
ازلدن وورغونام من گؤزل لیگه
قیزیل گول بولبولو گتیرر دیله
سئوگیلیم او تایدان منی سسله ییر
یوخ-یوخ دؤزنمیرم من بو نیسگیله
« چای اوغلو » داریخما گؤتور چال سازین
یاییلسین ائللره اودلو آوازین
داریخما گون گلر بختیار ایلن
کؤرپولر سالاریق اوسده آرازین
